Noticias de NavarraDiario de Noticias de Navarra. Noticias de última hora locales, nacionales, e internacionales.

Saltar al Contenido

Períodico de Diario de Noticias de Navarra
astelehenean joango da

Urkullu lehendakariak bidaia ekonomiko, instituzional eta kulturala egingo du Quebecera

EUROPA PRESS - 2017(e)ko urriaren 28a, larunbata - 11:48etan eguneratua

El lehendakari Urkullu

El lehendakari Urkullu (EFE)

Galería Noticia

El lehendakari Urkullu

Iñigo Urkullu Eusko Jaurlaritzako lehendakariak bidaia ekonomiko, instituzional eta kulturala egingo du Quebecera. Bidaia astelehenean hasiko da, urriaren 30ean, eta Urkulluk Montreal, Quebec eta Ottawa bisitatuko ditu eta harreman politikoak, historikoak eta kulturalak estutuko ditu. Eusko Jaurlaritzaren ordezkaritzak bilerak egingo ditu Quebeceko agintari eta erakundeekin, enpresa, hezkuntza eta kultura munduarekin eta euskal kolektibitatearekin.

GASTEIZ. Eusko Jaurlaritzak gogoratu duenez, Quebec "lehentasuneko bazkidea" da Euskadi-Basque Country 2020 nazioartekotzeko esparru estrategiaren barruan. Bere kultura eta hizkuntza aniztasunaren babesagatik, Euskadirekin lotzen duten harremanengatik, berrikuntzaren aldeko apustuagatik eta aldaketa klimatikoaren kontrako jarreragatik katalogatu da lehentasuneko bazkide.

Jaurlaritzako lehendakari batek Quebec bisitatzen duen lehen bidaia ofiziala izango da. Urkullurekin batera, Arantxa Tapia Ekonomiaren Garapen eta Azpiegituren sailburua eta Marian Elorza Kanpo Harremanetarako idazkari nagusia izango dira. Urkulluk legegintzaldi honetan (2016tik aurrera) atzerrira egingo duen bosgarren irteera izango da. Aurrekoetan, Erroman, Auschwitzen, Bruselan eta Bogotan izan zen.

"Euskadirentzako zein Quebecentzako aukeren agertoki batean biltzen da bidaia ofiziala. Aukerak erakunde harremanen arloan, lehen aldiz bilduko baitira bi gobernuak, eta kulturaren eta ekonomiaren arloan, CETA akordioa onartu ostean. Gainera, Eskoziak eta Quebecek legaltasun printzipioa eta printzipio demokratikoa uztartzearen eredu dira hitzartutako legezko galdeketaren bitartez", azaldu du.

Egonaldian zehar, Eusko Jaurlaritzako ordezkaritzak erakunde harremanak izango ditu Philippe Couillard Quebeceko lehen ministroarekin eta lankidetza memoranduma sinatuko dute. Horrez gain, Quebeceko Parlamentuko kideekin bilduko da, baita lehen ministrordea eta Ekonomia, Berrikuntza eta Zientziako ministroarekin ere.

Bestalde, Urkulluk bi hitzaldi egitea ere aurreikusi da: bat Montrealeko Nazioarteko Harremanetako Kontseiluan (CORIM) eta bestea herrialdeko unibertsitate garrantzitsuenetako batean, Laval Unibertsitatean.
Enpresa topaketei dagokienez, euskal ordezkaritzak berrtatik bertara ezagutuko ditu nazioartekotutako euskal enpresa batzuk eta Quebeceko puntako sektoreak. Halaber, IREQ bisitatuko du, nazioarteko eremuan erreferentziazko energiarekin lotutako I+G institutua.

Era berean, aurreikusita dago Quebeceko euskal erkidegoarekin biltzea eta euskal bale arrantzaleek inguru horretan utzitako ondarearekiko hurbilketa egitea, Parcs Canada erakunde federalarekin akordio bat sinatuta, erakunde horrek kudeatzen baitu Kanadako kultur eta natura ondarea. Azkenik, Gobernu Federalaren Global Affair saileko ordezkariekin ere bilera izango du (Kanpo Harremanak, Nazioarteko Merkataritza eta Lankidetza).

EUSKADI-QUEBEC

Euskadiren eta Quebecen artean "harreman historikoa" dagoela nabarmendu du Erkorekak, eta harreman hori etorkizunean lankidetza bide berriak jorratzeko oinarria izan daitekeela ziurtatu du. Kulturaren arloan, euskal bale arrantzaleak Quebecen finkatu ziren garaietan hasi zen bi herrien arteko harreman historikoa.

Quebeceko kostaldeko lurraldeetan duela mende batzuetatik izan da euskal presentzia. Esaterako, Trois Pistoles herrian Euskal Abenturaren Parkea dago, eta handik kilometro gutxira, Ternua eta Labrador probintzian, oraindik ere euskaldunen "nazioarteko lehen ezarpen" handiaren arrastoak daude, balearen arrantza eta industria. Gaur egun, Montrealeko Euskal Etxeak biltzen du Quebecen bizi den euskal erkidegoa.

Halaber, azken urteetan harreman estua sortu da ingurumenaren arloan, batez ere klima aldaketaren arloan. Bestalde, Euskadik zein Quebecek kanpoan proiektatzeko ikuspegi bera dute, eta etorkizunean baterako ekintzak gauzatzeko nahia azaldu dute.

Ekonomiaren arloan, berriz, eta CETA behin behinean abian jarri ostean, "Euskadi Europara sartzeko atea izan daiteke Quebecentzat", eta, era berean, Quebecek erraztu dezake euskal produktuak Kanadako eta AEBetako merkatuan sartzea.