altsasu. Altsasuko Burrunda fronotoian jokatu zen atzo Euskal Herriko XX. Eskolarteko Bertsolari Txapelketa. Goizeko 11.00etan 14 urtez azpiko neska-mutilak lehiatu ziren eta arratsaldeko 15.30etik aurrera, 15 urtetik 18ra bitarteko gazteak aritu ziren. Bai goizean eta bai arratsaldean, jende asko hurreratu zen frontoira. Zaleek euren lagunei egindako pankartek eta jotako txaloek alaitu zuten saioa.
14 urtez azpikoen mailan Malen Amenabar urretxuarrak jantzi zuen txapela, eta 12 urteko Maddiane Txoperena hendaiarra izan zen bigarrena. 15 urtetik 18rakoen artean bizkaitarrek eraman zituzten lehen bi sariak. Izan ere, Miren Amuriza berriztarra izan zen txapelduna, eta Jone Uria algortarra bigarrena. Edozelan ere, parte hartzaile guztiek eman dute maila itzela. Saio txukuna osatu zuten gazteek, maila ona erakutsiz.
Bai Uria eta bai Amurizak aurtengoa zuten eskolarteko txapelketan kantatzen zuten azken aldia. Biek ala biek 18 urte beteta dituzte eta Bizkaiko txapelketa nagusian parte hartuko dute aurtengo udazkenean.
Txapelduna aukeratu aurretik galbahea pasatu behar izan zuten bertsolariek, izan ere, goizean 14 gazte hasi ziren kantuan eta bai baten inguruan bertsoa bota behar izan zuten lehenengo; ostean, lau oinak jarri zizkien Rekondok bertso bana egiteko eta ondoren, ofizioka kantatu behar izan zuten zortziko txikian. Ariketa horiek amaitu ostean, sei bertsolarik egin zuten aurrera eta haien artean jokatu zen txapela. Maialen Akizu, Maddiane Txoperena, Amaia Elizagoien, Eñaut Saldumbide, Mikel Cherbero eta Johaiñe Sarraillet izan ziren galbahea pasatu zutenak. Hitza emanda bertso bana osatu behar izan zuten, eta ofizioka jardun ziren zortziko handian. Hor erabaki zen Akizu izango zela txapelduna.
Nagusien artean Ander Solozabal, Jone Uria, Miren Amuriza, Ane Labaka, Ximun Cazaubon eta Mattin Luku izan ziren galbahea pasatu zutenak eta ostean kartzelako lana izan zuten: puntuari erantzun eta gai baten inguruan bertso bi kantatu.
Julen Zelaieta Nafarroako bertsolari txapeldunak parte hartu zuen sari banaketan. Berarekin batera ibili ziren sariak ematen Koldo Tellitu Euskal Herriko ikastolen konfederazioko lehendakaria, Unai Ugalde Altsasuko alkatea, Manolo Arozena Nafarroako bertsozale elkarteko lehendakaria, Iñaki Murua Euskal Herriko bertsozale elkarteko lehendakaria eta Iparraldeko Bertsularien Lagunak elkarteko transmisio arduraduna den Maialen Iribarren.
Alaitz Rekondo izan zen aurkezlea eta Ekaitz Elorriaga, Mirari Azula, Bakarne Urreaga, Eneko Bidegain, Joxema Leitza eta Erik Etxart aritu ziren epaile lanetan.
Azpimarratzeko izan da parte hartzaileen artean izandako neska kopurua. Izan ere, 14 urtera artekoan artean, hamalautik bederatzi izan dira neskak. Azken urteetan nabarmen hazi da nesken kopurua bertso eskoletan eta eskolarteko txapelketetan argi ikusten da hori.
