iruñea. Azken urteotan bezala, Udako Euskal Unibertsitateak yogari buruzko ikastaro bat eskaintzen du egun hauetan bere menuan . Leire Saitua soziologa eta yoga irakaslea dugu, hain zuzen, gaur amaituko diren 14 izpi.ariketa herri-estresari aurre egiteko eskolen arduraduna. Herri-estresa, Saituaren hitzetan, "herri edo kolektibo bezala senti-tzen dugun estresa da; mendeak daramatzagu herri bezala egoera larri batean eta ez dugu horretaz hitz egin ere egiten. Alde honetatik sentsibilitatea galtzen ari gara nabarmen".
Ikastaro honen bitartez, partehartzaileek estres-kolektibo hau bideratzeko aukera daukate. Soziologa honen aburuz, "euskal herritarrok ez daukagu egoera politikoak eragiten digun estresa atera-tzeko modurik. Barruan gordetzen dugun zerbait da, arriskutsua da alde bateko edo besteko iritziak ateratzea".
Eskola hauen abiapuntua Jorge Oteizaren Ejercicios espirituales en un túnel liburua da. Honen inguruan Saituak hiru urratsetako prozesu bat egiten du: jaso, hausnartu eta sortu. Jasotzeko atalean, gai ezberdinak ekartzen dira: lehendabiziko egunean, adibidez, 18/98 prozesuko dvd-a jarri zen. Bigarren atalean, ikusitako gaiaren inguruan hausnarketa egiten dute ikasleek hitz borobila teknikaren bidez. Teknika honetan "hitz egiten duenak makil bat edo ur botila bat izaten du eskutan ete besteek entzuten dute; tentsioa sortzen duten gaiak jorratzen dira baina norberak barruan duena adierazteko aukera dauka", azaltzen du Leire Saituak. Honela, hirugarren atalean, jaso eta hausnartu ondoren, sortu egiten da, idatziz, pintatuz, kantatuz, etabar: "Norberari barruan mugitzen zaiona ateratzen eta lantzen da modu kolektibo batean ikastaroko urrats honetan".
Eguna bukatzeko, taldeak edozein polikiroldegitan egiten den moduko yoga saio bat burutzen du. Yoga ariketa hauen helburua, ikastaro guztiarena bezala, lasaitasun sakona lortzeko teknikak ezagutzea da. Saituak dionez, "lasaitasun sakon totala lortzea posible eta oso erraza da gainera: yogako arnasketa batzuk, postura eta lasaiketa minutu ba-tzuen bitartez edonork lortzen du sakon lasaitzea benetan".
Azken finean, hori da 14 izpi.ariketa herri-estresari aurre egiteko ikastaroaren helburua: bizi kalitate hobea lortu, autoestimua ere hobetuz eta gainerakoekin ditugun harremanetan kalitate handiagoa lortuz. >o.f.z.
