IRUÑEA . Azken urteotan bezala, Iruñerriko zenbait elkartek -zehazki Iruñeko Zaldiko Maldiko, Txantreako Euskaldunon Biltoki, Atarrabiako Karrikaluze, Burlatako Axular eta Berriozarreko Zorroka-, Topagunea Euskara Elkarteen Federazioarekin batera, formatu txikiko Kultur Zirkuitua antolatu dute Iruñerrian datozen asteotarako, beti ere euskararen erabilera susta-tzeko asmoarekin. Bost ikus-en-tzunezkok osatzen dute Kultur Errota egitasmoaren baitan dagoen Kultur Zirkuitua, denak munduan zehar egindako bidaien ingurukoak.
Bihar bertan hasi eta urriaren 23an amaituko den Iruñerriko Kultur Zirkuituan Alberto Iñurrategi, Jose Ramon Agirre, Amets Arzallus eta Txomin Txueka, Asier Arantzabal eta Mila Gallastegi eta Endika Fernandez bidaiari-abenturazaleek hartuko dute parte, beren diaporamen proiekzioarekin. Eskualde zirkuitu honen bitartez, hurbil dauden euskara elkarteen kultur programazioa koordinatu eta eskaintza bateratua lortzen da, emanaldiak "elkarren aberasgarri izan daitezen". Zentzu honetan, Zirkuituak hiru helburu dituela azaltzen dute antolatzaileek: "Euskarazko kultur eskain-tza aberastea, euskarazko kulturaz gozatzeko ohitura sortzea eta, azkenik, kulturgileen sorkuntza sustatzea". Honako hauek dira aurtengo proposamenak:
'begiz begi' Alberto Iñurrategik eskainiko duen ikus-entzunezko honetan jasotako gogoetek mendizaleek ongi ikasita izan beharko luketen ikasgai bati heltzen diote: mendizalearen eta bere helburu gutxi-asko exotikoetan aurkitzen dituen jendeen arteko harremanari, abenturan murgildu eta ba-tzuetan arrakastaren lekua ere baden horretan denean. Mendizaleak erabat gure berdinak direnik ematen ez duen horiekin duen harremana, atzerritarra esaten diogun hori, gizakia alegia, dugu lan honen ardatza, metafora eder baten bidez adierazia: "Edertasuna ezkutatzen duen luxua da kolorea, doi-doi amorratzen dakien oinazearen edertasuna". Filme hau mendizalearen irudi idilikotik urrun dago, gogoetarako akuilua izan nahi du eta.
'zelanda berria: naturaren hitzak' Jose Ramon Agirre Marron-en ikus-entzunezkoa da hau. Zelanda Berrian gaur topa-tzen dugun lurraldea ikusgarria da bere osotasunean: guretzat bitxiak diren animaliak, mendi itzelak, sumendiak eta itsas fauna oraindik oso aberatsa. Ikuskizun honetan, naturaren indarraren esentzia agertu nahi da eta, nola ez, Hego Aldeko Irlan tente eta zorrotz altzatzen diren Alpeetako Cook (3.755m.) mendien igoeran izandako bizipen zoragarria. Irudi ikusgarriek, Garbiñe Tolosaren hitz eta esaldi xumeek eta Pello Ramirezek bereziki sortutako doinu hunkigarriak bizia eman diote Zelanda Berrian aurkitutako esentziari.
'illimani: boliviako izpiak eta hitzak' Indigenek Twantinsuyu-Qollasuyu esaten diote Boliviari. Amets Arzallusek eta Txomin Txuekak hogei egun pasa zituzten han, Bolivian. Bertan gertatzen ari diren aldaketa politiko eta sozial sakonak beren begiz ikusi eta beren belarriz entzutera joan ziren, gero Euskal Herrian zabaltzeko asmoarekin. Evo Moralesek atea zabaldu zien. Argia aldizkarian erreportaje sorta bat argitaratu zuten, eta liburua atera ere bai gero, Illimani: Boliviako izpiak eta hizkiak . Orain, ikus-entzunezko hitzaldi bat muntatu dute, erakusketatxo batekin janzten dena. Ordu eta erdian, hi-tza, argazkiak, bideoak, ber-tsoak... denetik, Bolivia gertuago ikus, senti, eta uler dezagun. Eta indigenak askeago izan daitezen, bide batez.
'sahararen barrenak miatzen' Ikus-entzunezko honekin, Asier Arantzabal eta Mila Gallastegik Sahara basamortuan oinez egindako bidaia bitxi bat erakutsi nahi dute: Tassili N'Ajjeren ingurukoa hain zuzen. Berau, sumendi batetik sortutako landaretzarik gabe-ko goi-lautada da. Argeliaren hegoaldean kokatua dago eta 1.800 metroko garaierarainoko altuera du. Trekkinaren bereizgarritasuna Erg Admer duna kateen eta Tassili handiaren ertzetik ibiltzerakoan aurkitutako paisaien aniztasunean datza, haitzek eta dunek sortutako labirinto eta sakan luze eta estuen artean.
