Alde Zaharreko merkatariek lekukoa hartu dute, euskararen aldeko konpromisoa berretsiz

Bilboko Alde Zaharrean, 3384. kilometroan, lekukoa Zazpi Kaleak merkatarien elkarteak hartu du. Une berezia izan da, emozioz betea, non Susana Alaguero presidenteak eta Janire Torvisco zuzendariak, Alde Zaharreko hainbat merkatarirekin batera, lekukoa eskuetan hartu duten.

Harrotasunez adierazi dute ohore handia dela gaur Bilbon, jaiaren amaieran, irakurriko den mezua eramatea. “Euskara gurea da, gure identitatea da, desberdin egiten gaituena; eta Alde Zaharreko merkataritzan euskaraz artatzen dugu”, nabarmendu dute.

Korrika atzerapenarekin iritsi da, eta itxaronaldiak urduritasuna piztu du parte-hartzaileen artean. Hala ere, ilusioa eta konpromisoa nagusitu dira: “Ardura handia da”, azpimarratu dute.

Ibilbidea laburra izan da, baina oso esanguratsua: Erriberatik Somerara, handik Gurutzera, Sombrerería, Víctor kalea, Jardines eta Correo zeharkatuz, Barrenkale Barrena barrena. Kalez kale, Alde Zaharreko merkatariek berriro erakutsi dute euskararekiko duten atxikimendua eta eguneroko lanean egiten duten ekarpen garrantzitsua.

Egun honek agerian utzi du merkatariek herriaren bizitzan duten funtsezko papera: hurbiltasuna, identitatea eta hizkuntza bizirik mantentzeko duten konpromisoa. Euskaraz bizi eta lan egitea ez da soilik aukera bat, baizik eta Alde Zaharreko dendetan egunero lantzen den errealitatea.