Nerabeek ezingo dute Instagramen transmititu gurasoen baimenik gabe

16 urtetik beherakoek ezingo dute Instagramen zuzeneko transmisiorik egin gurasoen edo tutoreen baimen espliziturik gabe.Metak, sare sozialeko enpresa nagusiak, 16 urtetik beherako nerabeen kontuetarako murrizketa berriak iragarri ditu, eta muga horiek beste plataforma batzuetara ere zabalduko dira, hala nola Facebook eta Messenger plataformetara.

Ameriketako Estatu Batuek Meta eta haren sortzaile MarkZuckerberg nerabeak eduki kaltegarrien eraginpean jartzeaz formalki akusatu zituztenetik, erraldoi teknologikoak aldaketak egin ditu adingabeen segurtasun digitala hobetzeko. Hortaz, gazteenek bere plataformak, bereziki Instagram, sarritan erabiltzen dituztela jakinda, Metak berariazko tresnak garatu ditu haiek babesteko.

Adibidez, iazko irailean, murrizketa-sistema lehenetsi baten pean funtzionatzen duten”Nerabeen kontuak” sortu zituen, nahi ez ziren kontaktuen arriskua murrizteko.Kontu pribatu horietan, adingabeek baimena duten jarraitzaile berriak baino ezin dituzte onartu, jarraitzaileak ez diren erabiltzaileek ezin dituzte haien argitalpenak ikusi, ezta haiekin elkarreragin ere.Gainera, jarraitzen duten pertsonen edo honezkero konektatuta daudenen mezuak soilik jaso ditzakete.

Instagram Live gainbegiradapean

Nerabeen pribatutasuna babesteko hartutako beste neurri bat Instagram Live bidez egin ohi diren zuzeneko transmisioak debekatzean datza. Neurri horrek 16 urtetik beherako erabiltzaile guztiei eragingo die eta funtzionaltasun hori erabili ahal izateko ezinbestekoa izango da gurasoen baimena izatea.

Ildo berean, Metakzuzeneko mezuetan irudi sentikorrak edo biluziak automatikoki lausotuko dituen tresna berri bat barneratuko du. Nerabeen kasuan, funtzionaltasun hori ezin izango da desaktibatu heldu baten baimenik gabe.

Metak ezagutzera eman dituen datuen arabera, jada 13 eta 15 urte bitarteko 54 milioinerabe baino gehiagok erabiltzen dituztehorrelako kontuak. Gainera, erabiltzaile horien % 97k aktibo mantendu dituzte aurrez zehaztutako murrizketak eta, horrek, Metaren arabera, “beren adinerako esperientzia egokiena bizitzea ahalbidetzen die”.

Metak eskatuta, Ipsos enpresak Estatu Batuetan egindako inkesta baten arabera, neurri horiek guztiek harrera ona izan dute gurasoen artean. %94k uste du nerabeentzako berariazko kontuak baliagarriak direla seme-alabentzat eta %85ek uste du kontu horiek haien lana errazten dutela gazteei plataforman esperientzia positiboak izaten laguntzeko orduan. Are gehiago, gurasoen %90ek uste du ezarritako funtzio bakoitza baliagarria dela adingabeei laguntzeko.

Nerabeentzako kontuak Facebook eta Messenger-en

Emaitza positiboak eta neurri hauen onarpena ikusita, Metak babes-estrategia hau beste plataformetara zabaltzea erabaki du. Nerabeentzako kontuak laster iritsiko dira Facebook eta Messenger-era. Neurri hori, hasiera batean, bakarrik Estatu Batuetan, Erresuma Batuan, Australian eta Kanadan ezarriko da. Kontu horiek Instagramen jada existitzen diren babes neurriak izango dituzte, hala nola eduki desegokiak eta nahi gabeko kontaktuak blokeatzeko muga automatikoak, eta guraso-kontrolak erabilera-denbora kontrolatu eta kudeatu ahal izateko.

Eta ohitura digital osasungarriagoak sustatzera bideratutako beste neurri batzuen artean, gaueko jakinarazpenen mugak sartuko dira atsedena ez eteteko, eta orduro oroigarriak bidaliko dira aplikazioaren etengabeko erabileraren inguruan ohartarazteko.

Metak nerabeak babesteko hainbat neurri ezarri dituen arren,zalantzan daude, oraindik ere, gurasoak egiaztatzeko erabiltzen diren sistemak eta gurasoek edo legezko tutoreek soilik adingabeen kontuak ikuskatuko dituztela bermatzeko plataformak duen benetako gaitasuna. Izan ere, gaur egun, enpresak jaiotza-datak eta heldu batek gainbegiratutako kontu kopurua bezalako adierazleak erabiltzen ditu haien egokitasuna zehazteko, baina ez du guraso-harremana baieztatzeko egiaztapen formalik egiten. Gainera, Metak badu irtenbide zaila duen konpondu beharreko beste arazo bat. Izan ere, orain indarrean den sistemarekin, nerabe batek erraz faltsutu dezake bere adina kontu berri bat irekitzen duenean.