Gizarteak erritmo bizian garamatza alde batetik bestera, korrika eta presaka ibiltzen gara egiteko guztiak garaiz egin ahal izateko, hau guztia, gure bizitokiaren errimoarekin, Lur planetarekin hain zuzen, bat ez datorrelarik. Krisi klimatikoa pil-pilean dagoen garai honetan, erdigunean jarri dira natura eta honekiko izan behar dugun errespetuzko jarrera.
Erentzun Ikastolan ikasleen hezkuntza integrala bermatu egiten da hainbat proiekturen bitartez, ikasgeletatik haratago, testu-liburuetatik haratago doan hezkuntza-ingurunea eskaintzen da. 2014-15 ikasturtetik ESenRED Nafarroako jasangarritasun eskolen sarearen parte da ikastola, irakaskuntza iraunkorrarekin eta naturarekiko loturarekin dugun konpromisoa sendotzeko asmoz. Horregatik, ikastetxeko harribitxietako bat, zalantzarik gabe, gure baratzea eta inguratzen duten berdeguneak dira.
Erentzun Ikastolako baratzea laborategi bizia bihurtu da, eta ikasleek modu praktikoan landareen bizi-zikloari, biodibertsitatearen garrantziari eta ingurumenarekiko errespetuari buruz ikas dezakete.
Baratzeak, natur zientzien irakaskuntzarako espazio bat eskaintzeaz gain, talde-lana eta erantzukizuna loratzen diren lekua ere bihurtu da. Ikasleek aktiboki parte hartzen dute baratzea zaintzen, ereiten, ureztatzen eta lanaren fruituak biltzen dituzte. Prozesu horrek trebetasun praktikoak sustatzeaz gain, pazientzia, dedikazioa eta erantzukizuna bezalako balioak irakasten ditu.
Baratzeaz gain, gure berdeguneak aire zabalean erlaxatzeko eta jolasteko diseinatutako guneak dira. Espazio horiek, gure ikasleen ongizate fisiko eta mentalerako funtsezkoak izateaz gain, ikasgelen hedapen natural bat ere badira, non esplorazioaren eta behaketaren bidez ikaskuntza sustatzen den.
Naturarekiko lotura ez da bakarrik natur zientzietako arlora mugatzen. Irakasgai desberdinetako irakasleek ingurune naturala bere ikasgaietan integratzeko modu sortzaileak aurkitzen dituzte, matematikan hainbat motatako datuak jasoz (prezipitazioak, tenperatura…) edo baratzea proiektu artistiko eta literarioetarako inspirazio gisa erabiliz.
Erentzun Ikastolan ulertzen dugu ingurumenarekiko errespetua ez dela liburu bateko ikasgaia bakarrik, bizitako esperientzia baizik. Gure baratzea eta berdeguneak hezkuntza-tresnak dira, gure ikasleei naturarekiko estimazio sakona garatzeko eta planeta zaintzeko duten funtsezko eginkizuna ulertzeko aukera ematen dietenak.
Hezitzaile garen aldetik, konpromisoa dugu ez bakarrik adimenak lantzeko, baita inguratzen gaituen ingurunearekiko maitasun eta errespetu sakona lantzeko ere. Erentzun Ikastolako baratzea eta berdeguneak konpromiso horren lekuko biziak dira, ikasgelako hormetatik haratago doan hezkuntza giroa sortuz eta naturak berak eskaintzen digun edertasun eta irakaskuntzarantz hedatuz.
