Nire emazteak 30 urte ditu, 1,81 metroko altuera, 59 kiloko pisua eta 4 zentimetroko titiak (naturalak) eta gizon bakar batekin izan ditu sexu harremanak.
Neskalagun, emazte, ama, alaba, arreba edo lagunen argazkiz eta iruzkinez betetako “Mia moglie” (nire andrea) izeneko eta 32.000 gizon baino gehiagok erabiltzen zuten facebook-eko sarea antzeman eta salatu dute Italian. Ez da, hala ere, berria; ez eta tankera honetako sareek funtzionatzen duten plataforma eta herrialde bakarra. Milaka eta milaka dira gizonak, beren inguruko emakumeen argazkiak eta bideoak jaso eta, azken hauen baimenik gabe, bestelako gizonezkoekin partekatzen dituztenak. Argazkiak eta bideoak iruzkindu egiten dituzte (sarrerako lerroan jasotakoen antzekoak) eta gainontzeko gizonezkoen partehartzea sustatzeko galderak egiten, “ukitu izterretan, ikusiko duzu nola esnatzen den” bezalako aginduak emanez, jolasten jarraitu ahal izateko.
Eta kontua hori da, jolasa dela (erabiltzaileentzat). Etxeko materialarekin egindako pornografia honen egile eta hedatzaile askok ez dute inolako okerrik ikusten. Sarea eta sareko edukiak salatu dituzten emakume batzuek beren bikoteari arrazoibideak eskatu dizkietenean, jolasa besterik ez zela argudiatu dute.
Ganadua balitz bezala erakusten dira emakumeak, ordea. Behinola, esklabuak lez. Ezaugarri fisikoen arabera. Ezaugarri horiek benetakoak edo artifizialak diren adierazita eta “ganadua” zenbatgarren eskukoa den argituz.
Objektuak dira emakumeak. Norbaiten jabetzakoak. Eta jabeak berea den hori merkaturatzen du, ospea lortzeko, porno gisa kontsumitzeko, negozioa egiteko, edo jolasteko.
Objektu hutsalak dira emakumeak. Eta norbaitek erabakitzen du emakume horien irudiak nola eta zertarako erabili; norbaitek erabakitzen du emakume horiek direnaz desjabetzea; norbaitek erabakitzen du emakume horiek berak nahi duena izango direla. Meneko.
Ez da, hala ere, ezer gertatzen: jolas inuzente bat baizik ez baita. Gizonek bakarrik zilegiztatzen eta ulertzen dutena.
