Olentzero Lizarrako ikastetxeetara heldu zen

estella-lizarra. Abenduaren 22an Remontival ikastetxe publikoko D ereduko haurrek bisita berezia jaso zuten, Olentzero eta bere astoarena, hain zuzen ere. Goizean goiz patioan ongi etorria egin eta txikienek Olentzeroren eskutik opariak jaso ostean, herrira abiatu ziren Lehen Hezkuntzako haurrak dultzaina joleek animatuta eta astoa buru zutela. Olentzero ez zen esku hutsik etorri, goxokiak eta euskararen aldeko mezuak banatu baitzituen eskolako ikasleen artean, irrifar ugari sortuz. Lizarrako kaleetan euskal gabon kantak abestu zituzten eta baita dantzatu ere. Eguraldia triste egon arren, dultzaina joleek eta eskolako haurren ahotsek giroa alaitzea lortu zuten. Hala, eskolako euskara batzordetik eskerrik beroenak eman nahi dizkiete egun honetan era batera edo bestera parte hartu zuten guztiei.