Eguberrietako kontzertua gaur gauean Donezteben

dONEZTEBE. Herriko Mendi Abesbatzak antolatuta, Eguberrietako kontzertu berezia eskainiko da gaur arratseko 20.30etik aitzinera elizan.

Mendi Abesbatzak, Agorretako Musika Eskolako ikasleek, herriko Dantza Taldeak eta Amaia Iraola eskusoinujole trebeak parte hartuko dute emanaldian, baina horretaz gain, azken urteetan bidelagun izan duten luxuzko partaidea ere bertan izanen da: Donostiako Udaleko Txistulari Taldea.

Aurtengo berrikuntza nagusia errepertorioa izanen da, izan ere Gabon Abestiren bat tartean izanen bada ere, ez dute hauek osatuko kontzertuaren muina. Tankera desberdineko hainbat doinu joko dituzte aipatu taldeek batez ere Euskal Foklore nahiz sorkuntza berrikoak, horietako mordoa dantzarako aproposak izanen direlarik.

Guziarekin, emanaldi goxo eta alaia eskaintzea da Mendi Abesbatzaren helburua eta gogoz saiatuko dira partaide guziak hori lor-tzen, musika eta dantza armonia onean uztartuta.