GIZARTEA

Argia Ikastola, erabat murgilduta Nafarroa Oinez prestatzen

Tuterako Argia Ikastolak Nafarroa Oinez 2019ren aurkezpen ekitaldia egin zuen atzo

08.02.2020 | 16:24
La comunidad de Argia Ikastola aspira a que el Nafarroa Oinez de 2019 sea "la fiesta de todos y todas en la Ribera"

Atzo, urtarrilak 25, arratsaldeko 19:00etan, egin zen 2019ko Nafarroako ikastolen festa aurkezteko ekitaldia, Benjamin de Tudela institutuko ekitaldi-aretoan. 2019ko Nafarroa Oinez Tuteran ospatuko da, urriaren 20an, eta Argia Ikastola dagoeneko erabat murgilduta dago egun handi horren prestaketan.

Aurkezpenera jende asko hurbildu zen, besteak beste, udal ordezkariak, Eneko Larrarte alkatea buru zutela. Udal ordezkariez gain, gizarte eta kultura eragileak, eta Argia Ikastolako ikasleak, irakasleak, gurasoak eta laguntzaileak ere gerturatu ziren.

Bertaratutakoek ekimen xume eta hunkigarriaz gozatu zuten, besteak beste, William Shakespearen "Galdutako amodioen penak" obrako pasarte baten errezitaldia, ikastolako ikasle ohiez osatutako talde batek interpretaturiko pieza musikal bat eta dantzari talde bat 8 ahapaldiko makil dantza bat eskaini baitziren. Emanaldi horietan guztietan ingurumenaz, adiskidetasunaz eta laguntasunaz, irakasleez, kooperatibaz eta Nafarroa Oinez 2019ren Izan Argi! leloa osatzen duten lau atalez hitz egin zen.

Argia Ikastolako zuzendariak, Argiñe Kortak, eta kooperatibako lehendakariak, Maru Erizek, Nafarroa Oinez honek ikastetxearentzat duen garrantzia zeintzuek Argia ikastolako ezaugarri pedagogikoak azaldu zituzten.

Festa honen antolaketaren helburua, Argia Ikastolak egiten duen lanaren jarraipena bermatzea da; hau da, euskararen inguruan egituratzen den eta eredu kooperatibistan oinarritzen den hezkuntza eredu eleanitza eskaintzea. Eredu horren zutabe nagusiak auzolana, solidaritatea, konpromisoa, berrikuntza, autokudeaketa eta lankidetza dira, eta jatorrizko bokazioari eusten dio, zerbitzu publikoa eskaintzeari, alegia.

Ekitaldian bideo bat ere proiektatu zen, eta, bertan, norbanakoen testigantzen bitartez, ikastola eta ikastola eredua aukeratzerakoan zergatik izan behar dugun argi -IZAN ARGI!- azaldu zuten: hezkuntza eredu propioa, hizkuntza aniztasuna, eskualdekoa, kooperatiba europarra, gertutasuna, konpromisoa, parte-hartzea.

Bukatzeko, eskertzen eta urtean zehar antolatuko diren ekitaldietan parte hartzeko gonbidapena luzatu ondoren, 1995ean Tuteran ospatu zen lehen Nafarroa Oinezeko jota interpretatu zen.