1981ean izan zen. Eusko Ikaskuntzako Eugenio Arraiza jaunak antolaturik, Xabier Amurizak hamar saioko bertso ikastaroa eman zion Iruñean 30en bat laguni. Saioen ondotik, Dindatxikiko Catachura joan eta, taberna giroan ikasleak ausartago agertzen baziren ere, ez zen oraindik bertsorik ateratzen haien ezpainetatik. Ikastaroa bukatzean, ordea, Atarrabiako Etxebeltza elkartean afaria egin eta, Amurizak zirikatuta, neketan baina koplaren bat aditu zen, oinak mahai-zapian idatzita. Bertso antzeztuen jendaurreko saioa ere egin zuten Eskolapioen ikastetxeko ekitaldi aretoan. Han aritu ziren, bertzeak bertze, Lontxo Aburuza, Mikel Burgi uxuetarra, Mikel Taberna eta Aitor Etxarte…, gehienak Ansoleaga karrikan sortu berria zen Zaldiko Maldikoko kideak, eta hantxe jarraitu zuten buru-belarri bertsolaritza Iruñean eta Nafarroan antolatzen, hauspotzen, zabaltzen.
Relacionadas
1986an, bertze ikastaro bat antolatu zen Zaldikon, Felix Iñurrategi zenak emanik eta, horrez gain, astean behin, bertsotan aritzera elkartzen ziren, lehen ikastaro hartatik ateratako jendeaz gain, Iruñean bizi, lan egin edo ikasle zebiltzan bertsolari aunitz (Patxi Zeberio, Niko Izeta…; geroago, Unai Agirre…), bai eta bertze batzuk ere, hala nola Rikardo Gonzalez de Durana arabarra eta Bittor Elizagoien baztandarra, Zaldikoko kidea, eta 94an eta 99an Nafarroako txapela jantzitakoa. Gero, mende berrian, Iruñerriko Bertso Eskolak antolatzen aritutakoen artean, bada Zaldikoko kiderik (Rosita Anakabe, Aitzol Mendiola…), bada bertsolari gazterik (Irati Majuelo), bai eta finalistarik ere (Sarai Robles), atzendu gabe Saioa Alkaizak helduen bertso eskola ematen duela Zaldikon.
Bada, atzo, elkartearen 45 urteko bertso ibilbide oparoaren esker onean, Zaldiko Maldikoko lehendakari Sergio Barandiaranek jantzi zion txapela Illarregi leitzarrari.