iruñea - Miren Tirapu aktore eta zuzendariak sortutako Beheko Larraine antzerki taldeak emango dio itxiera, gaur, Iruñeko Udalak eta Nafarroako Antzerki Eskolak elkarlanean antolatutako Antzerki Aroarren udaberriko edizioari. Emanaldia NAE-n eskainiko da Manifestu bat izeneko komedia kritikoa, arratsaldeko 20.00etan. Sarrerak, NAE-ren webgunean bertan erosi daitezke, baita antzokiko leihatilan bertan ere, emanaldia hasi baino ordubete lehenago, zor-tzi euroko prezioan.
Tirapuk berak zuzendu eta protagonizatzen duen Manifestu bat obra, bizitza eta heriotzaren inguruko begirada ironiko bat da. Protagonista, marginatu bat izatera kondenatua, begirada guztien erdigunean ikusiko du bere burua azken agurraren unean. Une horretan, publikoaren begirada bilatuko du bere barreneko ahotsen bitartez, bere “azken besta handira” gonbidatuz.
Zuzendaria Iruñean jaio zen 1981ean. Kataluniako Centre de Estudis Cinematografics-ean lizentziaduna, aktore eta zuzendari formakuntza jaso du, besteak beste, Bartzelonan (María Stoyanovarekin), Poloniako Grotowski institutuan edota Cubako E.I.C.TV-an. Konpainia desberdinekin jardun ondoren, Beheko Larraine abiarazi zuen. Aldi berean, haur eta helduentzako tailerrak eskaintzen ditu. - M.M.P.
Zuzendaritza eta aktorea: Miren Tirapu Goikoetxea
Egilea: Gaizka Sarasola Iartzabal
Argiak: Andoni Mendizabal Andonaegi
Argazkiak: Itziar Matxain Urra
Kartela: Araiz Mesanza Iturritxa
Generoa: Komedia kritikoa (45’)
