Ikastolen Elkarteak ostiral honetan iragarri duenez, Herri Urrats, Ibilaldia eta Araba Euskaraz ez dira udaberrian ospatuko. "Saminez hartu behar izan dugu erabaki hau, ez zegoen beste irtenbiderik. Euskal Herrian eta munduan maiatz eta ekainerako antolatutako ekitaldi guztiak bertan behera geratu edo atzeratu egin badira, ezinezkoa zen gu salbuespen izatea", adierazi dute Twitter bidez. Hala ere, ekitaldiak ez dira bertan behera geratuko: "Ikastolen Elkartearen baitan, beraz, bost jaietako arduradun eta ikastola antolatzaileekin batera, aztertzen ari gara Herri Urrats, Ibilaldia eta Araba Euskaraz jaiak beste data batzuetara eramatea".