- Urtero bezela, aurten ere ailegatu da bertsoen zurrunbiloa gure eskolara Bertsolaritza Irakaskuntzan programaren bitartez. Urte ugari dira Nafarroako Bertsozale Elkarteak, Nafarroako Hezkuntza Departamentuarekin eta hainbat udalerrirekin elkarlanean, bertsolaritza lantzeko programa hau martxan jarri zuela.
Ikasturte honetan, Estitxu Arozenaren laguntza paregabeaz, gure 5. mailako ikasleak ederki ari dira trebatzen hitzaren kirolak eskaintzen dizkigun baliabide guztietan. Eta proposamenak anitzak dira kasu honetan:
Alde batetik, garaian garaiko bertsolaririk ezagunenetara hurbilduko dira ikasleak, hala nola, Pernando Amezketarra, Bilintx, Txirrita, Basarri, Xalbador, Xabier Amuritza... Luzaroan ezkutuan utzitako emakume bertsolariak, Bizenta Mogel, Joxepa Antoni “Xenpelar, Mikaela Elizegi eta bertze hainbertze. Eta gaur egungo bertsolariak, Maialen Lujanbio, Amets Artzallus, Oihana Iguaran, Julio Soto eta abar luze bat.
Bertze aldetik, bertsoak eskain-tzen dizkigun bitarteko ludiko guztiak aprobetxatuz, ikasleek bertsoen teknika bereganatzen dute, era berean irudimenari, enpatiari, talde lanari... leku eginez. Jolas eta ariketa ezberdinak direla medio, antzerkiak eginez... Ehundaka aukera daude bertsoa eta bertsolaritza lantzeko. Eta nola ikasten da gehien? Ba bai, hasiera hasieratik buru belarri murgilduz bertsoen unibertsoan, bertsolari bihurtuz eta bertsoak osatuz. 2 puntu dituzten bertsoekin hasi eta infinituraino. 2 oin dituzten bertsoekin hasi eta nahi duzunerarte. Hau da, koplekin hasi eta neurririk luzeeneraino. Eta horren adibide, zuen guztion gozamenerako, hona hemen 5. mailako ikasleek osatu dituzten kopla ederrak!
Doinua: Ama begira zazu
Urduri hasi dugu
bortzgarren kurtsoa
ta orain ari gara
botatzen bertsoa
Lesakako eskolak
izena du Irain
denei jarri digute
portaeran bikain
Garazi, Aroa, Aitor,
Martina ta Alaitz
Uxue, Mikel, Kemen,
Eneritz ta Ekaitz
Unai, Oier, Aroia
dira gure izenak
eta maskarillakin
jolasean denak
Gazte aspergarria
nolako klasea
hamekak bortz guttitan
sartzen zait gosea
Hiru saio ta gero
atsedenaldia
eta agertu zaigu
bidean zaldia
Bertsoa kantatzean
hasten gara irrika
klasean eserita
patioan korrika
Ingelesa ta gero
egin dugu mate
eskola bukatu da
aio bihar arte